Ергә япраҡ ҡойолған,

Һап-һары келәм булған,

Япраҡтарҙы беҙ йыябыҙ,

Гөлләмә яһап ҡуябыҙ!!! -тип кескәйҙәр төркөмө тәрбиәләнеүселәре һап-һары ергә ҡойолған япраҡтар менән вальс бейеүен бейеп сыҡтылар. Көҙҙөң матур, алтын көндәре кемдең генә күңеленә инеп ятмай һуң? Кемгә генә көҙ миҙгеле оҡшамай икән? Беҙҙең кескәйҙәрҙә 31 октябрь көнө "Көҙһылыуҙың кәрзине" исемле иртәлеккә атай-әсәйҙәрен, өләсәй-олатайҙарын, апайҙарын, инәйҙәрен саҡырған  инеләр. Шулай уҡ иртәлек булғанын Көҙһылыу ҙа ишетеп ситтә тороп ҡалмаған. Ул үҙенең бик тәмле, ҡып- ҡыҙыл, үҙ баҡсаһында үҫкән алмаларын күстәнәскә алып килеп тә еткән. Балалар бик ҡыуанып, шатланып уны ҡаршы алдылар. Кескәйҙәр алмалар өсөн рәхмәт әйтеп "Емештәр" йырын бүләк иттеләр. Мәүлитова Нурия, Шарапова Алтынай, Ҡоланбаева Аделина, Астанбаев Арсландың тасуири итеп ятлаған шиғырҙары таң ҡалдырһа, ә бергәләп йырлаған йырҙары, түңәрәк уйындары, хәрәкәтле уйындар килгән ҡунаҡтарға бигерәк  тә оҡшаны. Музыка етәксеһе Рәмилә Абдулхай ҡыҙына һәм тәрбиәсе Зөлфиә Ғәлләм ҡыҙы Ҡәйепҡоловаға атай-әсәйҙәр ҙур рәхмәт белдерҙе.